Një mundësi për t’u kapur në fluturim, një mundësi për të përforcuar ekipin pa asnjë kosto, që nuk duhet humbur. Interi monitoron merkaton për sezonin e ardhshëm dhe studion profilet e lojtarëve që iu skadojnë kontratat. Mes tyre është edhe Matthias Ginter, mbrojtësi i lindur më 1994, kampion bote me Gjermaninë në vitin 2014.
27-vjeçari njoftoi të martën përmes një postimi të publikuar në Instagram vendimin për të mos rinovuar kontratën që e lidh deri më 30 qershor me Borussia Monchengladbach dhe dëshirën për të nisur një aventurë të re.
“Pas një sërë negociatash, kam vendosur të mos e zgjas kontratën, e cila skadon në verë. Pas 5 viteve të shkëlqyera te Borussia Mönchengladbach është shumë e vështirë për mua të bëj këtë hap, por kam vendosur të marr një rrugë tjetër në karrierë për rritjen time personale dhe profesionale. I detyrohem shumë Borussia-s dhe do ta kem gjithmonë në zemër klubin dhe tifozët e saj”.
Mbi 270 paraqitje në Bundesligë me fanellat e Borussia Dortmund, Freiburg dhe Borussia Monchengladbach; 39 në ndeshjet ndërkombëtare mes Champions League dhe Europa League. Ginter ka grumbulluar një pasuri të madhe eksperience, së cilës i shtohet shkathtësia dhe përshtatja me sisteme të ndryshme të lojës.
Ai ka luajtur tashmë në mbrojtjen me 3 dhe 4 lojtarë. Karakteristika që nuk kanë kaluar pa u vënë re në sytë e drejtuesve të Interit, të cilët prej disa kohësh janë fokusuar te 27-vjeçari.