Performanca e Leo Messit ndaj Real Madridit, në fitoren 1-0 të së martës mbrëma, ndezi debat në Francë. Temë diskutimi është ndikimi i vërtetë i yllit argjentinas te Paris Saint-Germain. Lojtari më i fortë në botë u eklipsua nga shoku i skuadrës, Mbappé.

Fat i madh që ky i fundit shënoi, duke e bërë më pak të hidhur penalltinë e humbur nga 7 herë fituesi i “Topit të Artë”. Emmanuel Petit komentoi për “RMC Sport”: “Mbreti i PSG tashmë është Mbappé, nuk e kuptoj pse Lionel nuk përpiqet të luajë me të.

Kur Neymar hyri në fushë, padyshim që po kërkonte të kombinonte me Messin. Tani udhëheq Mbappé, ndaj i takon atij të vihet në shërbim të Kylian, nëse dëshiron të jetë vendimtar dhe të fitojë zemrat e parizienëve”.

Nga ana tjetër, Nicolas Anelka shtoi mbi këtë debat: “Të gjithë ia kalojnë topin Messit për ta përmirësuar atë, por kjo e ngadalëson lojën e PSG. Ai është numri 9 që luan si 10, tërhiqet për të marrë topat dhe për t’i shpërndarë ato. Skuadra do që Leo të evidentohet, të shkëlqejë. Por, deri kur duhet të jetë kështu?”